اهلا و مرحبا بكم فى حلقة جديدة من برنامجم الغير اسبوعى صباح الخير يا جريمة تييييييييييييييييييييييت

شكرا , شكرا , شكرا كما وعدناكم باستكمال موضوعنا السابق باك تو سكووووووووول

Clap Clap Clap Clap Clap Clap

نخش فى الموضوع........النهاردة كان اول يوم و الطبيعى ان واحدة زى تنزل 2 او 3 اسبوع بس جيت على نفسى و قلت انزل بما انى كده كده رايحة مشوار قريب من الجامعة قلت اعدى اطمن على القبائل هناك و اشوف اية اخر التطورات...

صحيت الصبح ( قصدى كنت صاحية من امبارح يعنى ) و حضرت اللبس عشان البس و المفاجأة الكبرى السويت شرت كلة نمل و ماحدش يسالنى جة منين !!!!! و ماتقوليس (سويت) شيرت يعنى شيرت مسكر( مش طالبة ظرف) .....الشيرت دة حكايتة حكاية هقولكم عليها :

الشيرت دة جبتة فى اخر الاجازة و ماتلبسش و لا مرة بسبب النمل , كل مرة اجى البسة الاقى علية نمل غسلتة 3 مرات و احطة فى الدولاب و اجى البسة الاقى نفس الحوار و الغريب انة الوحيد اللى علية نمل و مافيش نمل فى الدولاب اصلا على اى حاجة تانى , و ياريت علية نملة و لا اتنين دة هجوووووووووووووم نمل بشكل غريب مش عارف هو مكتوب على بالحبر السرى منتجع النمل الصحى يرحب بكم و لا اية ؟

المهم انى جهزت كل حاجة تقريبا و طلعت الشيرت لقيت نفس الحوار قلت على و على اعدائى هلبسة يعنى هلبسة و كويتة (انتقام الجبابرة) و لبستة و نزلت و انا فى الطريق وشفت العيال الصغيرة بتجرى فى الشارع فرحانة بالكوتشى الجديد و الزمزمية الجديدة و الشنطة فلة و سابق و لاحق و ابطال الديجيتال (اة لو يعرفوا اللى فيها........)

و كنت سامعة ميكروفونات المدارس و الاذاعة شغالة و المدير بيدى التعليمات للطلبة افتكرت ايام الطفولة ايام التعليمات اللى كنا بنعملها ودن من طين وودن من عجين

-ممنوع الخروج برة الفصل بين الحصص

-ممنوع الاكل فى غير معاد الفسحة

-ممنوع التاخر على الطابور الصبح و على الحصص بعد الفسحة

-الخ الخ الخ

و طبعا كانت المدرسة تخرج من هنا و احنا وراها على الحوش بتاع المدرسة جرى , و اكيد نيجى الصبح متاخر عشان مش طالبة دوشة طابور ......كانت ايام مرت زى الحلم , كنت وقتها حلم حياتى انى ادخل الجامعه عشان اهرب من الواجبات و امتحانات الشهر و رعب نتايجها.....و ياريتنى ما حلمت و لا الحلم اتحقق

المهم نرجع لموضوعنا , خلصت المشوار بسلام و طلعت على الكلية و اقول كلمة لقيتى نفسى بقولها بتلقائية

I want to explode all that

ماعلش انا افكارى دايما بتكون انجليزى , المهم انا ماعرفش انا لية قلت الكلمة دى الا فى اخر اليوم !!!!!!!ء

دخلت النادى ,قصدى الكلية و شفت المناظر اللى تحرق الدم (قصدى تفرح) و افتكرت الجملة الشهيرة (رسالة من شباب مصر: المناظر دى تحرق دم اى شاب ) , سنة اولى تايهين و قلقانين و احنا (سنة رابعة) واقفين نضحك و نفتكر ايام الهبل بتاعة اولى و اد اية كنا بيبيهات , لازم نحضر المحاضرات كلها و نكون فى الكلية قبل المحاضرة بربع ساعه او نص و لو فاتتنا محاضرة نروح نعتذر للدكتور و نسال اخدوا اية و الحركات الهبلة دى

اما من سنة تانية بقة عادى (شخصيا ) بنزل قبل معاد المحاضرة بنص ساعة و ممكن تلت و اصلا من البيت للمحاضرة بتاعة ساعة الا تلت و ادخل اجيب شاى الاول و بعدين ابقى افكر فى المحاضرة ,  اللى يفوتنى مش مكلة لا ابكى على اللبن المسكوب , و حكاية الحضور دى حسب المود بتاعى و لو مضطرة ادخل المحاضرة و افتح الكتاب بتاع الدكتور و احط جواة اى كتاب تانى اقرء فية لحد ما يخلص  (اصلة كدة كدة حضورى دة تحصيل حاصل )

اخدت لفة فى الكلية و قبلت زمايل كتير اوى النهاردة و 5 فشر طبعا كل واحدة تقولى وحشانى و اقولها و انتى اكتر و انا اصلا ممكن اكون ناسية الاسامى و كل لما اسلم على حد اقولها ازيك يا جميل عامل اية (اصل انا مش ذاكرتى حديدية وخصوصا ان مش طالبة معايا كلية اصلا )

قلت كفاية كدة اروح انقل الجدول........و خير اللهم اجعلة خير مالقتش الجدول !!!!لية يا شباب ؟ اصل النور قاطع من الصبح و الجداول لسة ماتصورتش !!!!!!!! كلية طويلة عريضة ماكنتش قادرة تجهز شغلها من امبارح ؟؟؟؟!!!!!!ء

المهم استنينا لحد قبل الظهر بشوية لما النور جة و ياريتة ما جة و ياريت الجدول ماتعلق.........كان صدمة عمرى , مش جدول , دة انتقام ...دكاترة حسبى اللى و نعم الوكيل واحد كنا بنام فى المحاضرة بتاعتة من المل و مش مبالغة كنا بنام فعلا و امتحانتة ما يعلم بيها الا ربنا و كتابة عايز الحرق.

و التانى عرفنا قصة حياتة من صغرة لحد ما بقى دكتور و لسة ماخفى كان اعظم .....يعد يحكى المحاضرة كلها عن نفسة و اسرتة و الاخلاق و المبادئ و هو (حسبى الله و نعم الوكيل فية ) ماحستش فى حياتى بالظلم اد ما حسيت من تقديراته فى سنة تانية لدرجة انى الاجازة دى كنت بحلم انى بتخانق معاة و كل كابوس اقوم منة احس انى صوتى تاعبنى من كتر الخناق.

و التالت واخدنا احتكار يو مالخميس من 8 لحد 2 تقريبا اربع محاضرات لية هو بس عشان بيدينا مادتين....اى نعم هو مش وحش للدرجة بس مش لاقية لمحاضرتة اى لزمة يدخل و الطلاب يقوموا يسمعوا اللى فى الكتاب بالنص (  و الله مرة مسكت الكتاب لقيت العيال حتى مش ناسبن حرف الجر "بسم اللة ماشاءاللة" )

مش هم دول بس الدكاترة اللى علينا بس هم دول اللى حرقوا دمة و جابولى احباط ....وقفت انا و زمايلى قدام الجدول فى حالة ذهول مش مصدقبن ان هم دول دكاترة اخر سنة اللى المفروض ان السنة دى عليها اعلى تقدير , بالمنظر دة ربنا يستر على التقدير, و انا اللى كنت عاملة حسابى انى هلتزم نوعا ما , بالطريقة دى على رقبتى اانى احضر محاضرات اصلا.

المهم ان بعد لما النور جة عميد الكلية القى كلمتة و رحب الطلاب الجدد و اداهم التعليمات التى كانت فى مجملها ( اياك ثم اياك ثم اياك الاقى اى واحد اعد مع واحدة لوحدة ) كتر خيرة والله بيحاول يحد شوى من فساد الاختلاط و طبعا شوية كلام تانى حسسنى انى فى جامعههارفرد او اكسفورد و ان الجامعة بتاعتنا الاولى على العالم فى اتكنولوجيا....اى نعم احنا فعلا فى زمن قياسى جدا الكلية اتغيرت بس ...يعنى

و حفلة الدى جى اشتغلت و بما انى ماليش فى الجو فقلت امشى احسن بس بجد كان يوم عصيييييييييييييييب بمعنى الكلمة , رجعت ميتة من الشمس و اديها كوااااااااااااااااااابيس ....ربنا يستر بكرة, و اخر حاجة افتكرتها و انا على الباب ماشية الجملة اللى انا قلتها و انا داخلو و عرفت انا قلتها لية و بكررها تانى

I want to explode at that ,I wish I can make it undo