على الرغم من الخنقة اللى انا كنت عايشة فيها امبارح الا انى كنت متأكدة ان فى حاجة هتحصل و هتغير الحال..اية اللى حصل  عشان اتخنق و اية اللى خلانى افك خلينا نشوف

(1)
بدء الموضوع لما صحيت الصبح بدرى ظنا منى ان النتيجة فى اليوم دة نظرا لكثرة الشائعات اللى دارت حلو النتيجة و ماحوليها و نظرا لتفضل بهوات شؤن الطلاب -بمرجحة- الطلاب ,واحد يوقلك بكرة و التناى بعد 10 ايام و واحد السبوع الجاى و هكذا , المهم ان كان ظنى خاطئى و بدلا من النزول للكلية ذهبت -كست البيت الشاطرة- لشراء مستلزمات الغدا و من الطبيعى ان تتوقع انه لم يكن بناء على رغبتى بل هو امر من القايدة العليا , نزلت فىالشمس و احسست -بتؤيرة- فى دماغى مش الشمس و خاصة انى تلفحت بالسواد فى هذا اليوم و عدت الى المنزل كالهائم فى الصحراء لا يرى امامة سوى سراب المياة و لا يحلم سوى -ببسين- مياة مثلجة -ياخدلة غطس -و يطلع تانى.
ولان الغدا كان -محشى..فضلة خيرك يا خويا- و لو عرفت انى اكـــــــرة عمل المحشى و لا انوى تعلم كيفية لف المحشى تستطيع ان تتوقع ان هناك حروب اهلية سوف تحدث و خاصة و ان علاقاتى لم تكن جيدة من اليوم الذى سبقة.بسبب رفضى لما فعلتة اختى و اعتراض امى لانى اصغر اخوتى و على التزام الطاعة -وبينى و بنكم اول مرة تقولى الكلام دة-واكيد هذا الكلام كان بالنسبة لى ودن من طين وودن من عجين

هى:يلا عشان تعملى معايا المحشى
انا:انا رايحة اغسل
هى:مش وقتة ,هو انتى و اختك حبك الشغل دلوقتى
انا : و انا مالى هى اللى عايزة تنقل اوضتها و دى مشكلتها هى انا قلتلها لآ و هى اللى الى مصرة و بعدين هى قالت مش عايزة مساعدة
هى: لم ترد على

ذهبت و غسلت -و عملت فرح كأنى بغسل هدوم البيت كلة-و كان الغسيل المزعوم يتكون من جيب جينز و كوتشى , انتهيت من ذلك الماتش

هى:اتفضلى مش خلصتى
انا:انتى عارفة انى مش بعمل محشى, اخرى هاعملك المطبخ بعد لما تخلصى
هى:لا مش عايزاكى تعملى المطبخ , اعملى المحشى
انا:مش هاعمل محشى , ماتناديها هى تساعدك و انا هاعمل اى حاجة تانية
هى:انتى مبسوطة بطولة لسانك دة -نظرا لانى هللت و زعئت على اللى اختى بتعملة - اهى اختك زعلت و بتنقل اوضتها ترجعها تانى
مبوسطة كدة
انا:طب و انا مالى, هو خلاص انا اللى كلامى بئة بيتسمع دلوقتى
هى:انتى مش اعدتى تزعئى
انا:يا سبحان الله مانا من امبارح عمالة اهاتى و اقولها لو هتنقلى انقلى انتى انا مش هانقل انا عاجبانى افضل فى اوضتى و هى اللى اصرت..ماسمعتش كلامى امبارح لية بئة !! وهو انا اللى على اسمع كلام كل واحد فى البيت يعنى
هى:ايوة انتى الصغيرة
نعم:لية ان شاء الله لسة عاملة ضفاير -لان اول مرة اسمع كلمة انتى الصغيرةدى-اية المشكلة لما كل واحد يعمل الىل عايزة
هى: لية ان شاء الله , بيت سايب
انا : لآ بس اية المشكلة هى تنقل اوضتها و هدومها انا مش عايزة انقل انا حرة
و طبعا تعالت الصيحات و تعارضت الافكار -كالعادة طبعا- و فى النهاية كنت انا الغطانة و السو بتاع البيت و الباقى كلة ملاك برئ
هى:اتفضلى عشان المحشى
انا: مش هاعمل
كلمة منها على كلمة منى اتقلب الوضع
هى:اتفضلى برة المطبخ و مش عايزة منك حاجة
انامشيت من غير ما رد و رحت عملت شغل البيت و خلصتة و دخلت عشان اعمل المطبخ لقيت ماما راحت سايبة اللى فى ايدها و حلفت ما انا لامسة حاجة من المطبخ و انها مش هتطللب منى حاجة و لما يجىى بابا يتصرف معايا-كدة احلوت و قلت يبقىانا رحت فى ابو نكلة-فضلت قاعدة فى الاوضة لحد ما بابا جة -كأنى مستنية النطق بالحكم- وبحالو افكر فى اى حاجة تخلينى ماضايقش

هى:اتفضل شوف حل فى بنتك
هو:مالها؟
هى:مارضتش تعمل المحشى و اعدت تزعئ و قلة ادبها و زعلت اختها و هى عارفة انى تعبانة و ظهرى واجعنى و مش بقدر اعمل المحشى لوحدى..دلوقتى حالا الموبايل يتسحب و الكومبيوتر يتشال و مافيش خروج من البيت
انا: و بعدين يعنى؟؟
موباي لو كومبيوتر و حبسة ..اعد العب يوجا انا يعنى و لا اية؟- محاولة منى لتطليف الجو عشان اللى بتقولة لو اتعمل انا هاروح فيها-
هو: ضحك ,وقالها طيب اهدى بس
انا:"محاولة فاشلة للحمل الوديع" يعنى انت ماشفتش الصبح و هى بتزعئلى عشان الاطباق مش مغسولة و انا غاسلاها قبل لما انام!! انا اية مشكلتى ان البهوات رجعوا متاخر و بهدلوا اطباق تانية
هى: انتى قاعدة هانم فى البيت و مش بتعملى حاجة -مقارنة باختى و بيها انا مش بعمل مجهود قدهم  فدى عداها العيب صارحة يعنى-

و انتهى الحوار ان بابا هداها و انا دخلت الاوضة و قعدت اقرء كتاب

طبعا اليوم كلة كان اعتكاف فى اوضتى و مش بكلم حد و تانى يوم نفس الحوار خرجت من الاوضة بعد العصر كدة مالقتش حد فىالبيت غيرى انا و ماما انا باقى افراد العائلة فتوقعت انهم سافروا بما فيهم اختى -صبااح الندالة و صبااح اللى بتغنى و صباح كل حاجة زفت-
(2)
الست اختى و البية اخويا و الست بنت عمى سافروا مع بابا مع العلم انهم عارفين انى عايزة اسافر و المفروض ان قبل الخناقة كنا متفقين اننا يا هنسافر مع عمى يا هنسافر مع اخويا ..طبعا كانت بمثابة -بيع يا فوزى- و حسيت كأن جردل مية مثلج -ادلق على- و انى مش طايقة اسمع اسم الاتنين لا اختى ولا اختى 
(3)
فضلت على الحال الاسود دة لحد الساعة 10 لليل لحد ما اخواي اتصل و قالى انظلى دلوقتى عشان عايز حاجة مهمة من البيت و مش هايقدر يجى يخدها ..طبعا قلت لماما و اضطرت اسفة انها تنزلنى عشان اخويا, نزلت و انا متاكدة ان الجو الاسود دة هينتهى و قد كان جالتى مكالمة -هى احسن ماحدث لى ذلك اليوم- فقد ككانت مكالمة غير متووووقعة بتاتا من حيث المتصل و التوقيت و الموضوع و كانت من احد زملائى يهنئنى فيها بنجاحى
انا:نجحت ازاى يعنى؟
هو:نجحتى صافى بتقدير تراكمى جيد تقريبا
انا:متاكد انى ماشيلتش مادة المناهج
هو:ايوة متأكد
انا:انت بتتكلم جد
هو:ايووة
و باقى المكالمة كانت عن النتيجة و بتاع..ما اسعدنى فى تلك المكالمة لم يكن خبر نجاحى على قدر سعادتى بالمتصل نفسة, لانة من الاشخاص الذين ظننت ان كل شيئ قد انتهى معهم بانتهاء الدراسة , الا اللهم لو كان هناك شيئ خاص بالشغل , فطوال 3 سنوات لم يتصل ليهنئنى لا هو و لا احد, لم اتقلى اتصال فى حياتى من احد يخبرنى بنجاحى, و لا اخفى الخبر انى لم افرح بنجاحى مثلما يحدث مع باقى الخريجين و لا اعلم السبب , محتمل ان يكون لانى غير راضية عن التقدير او لانى لا احس بة لعدم حبى لدراستى اصلا..على كل كانت تلك المكالمة بمثابة النجمة التى ابعدت عنى شبح الظلام و الحزن, تنفست بعدها الصعداء و على وجهى ابتسامة تفاؤل و فرحة

.
قابلت اخى و سلمتة اغراضة و غادرت و قابلت قريباتى و-وجبنا فول و طعمية-ورجعنا للمنزلو فى الرجوع الهاتف يرن و ماما تتصل كانت الساعة ال12 االا حاجة بسيطة
انا:قشطة..صباح البتنجان
هى:انتى عارفة الساعة كام اكيد هتزعئ
انا:مش غلطتى مش عقبال ما قابلت البية و اخد حاجتة..يلا عادى مش مشكلة احنا تحت البيت,,كنسلت و طلعت البيت

انا:السلام عليكم و دخلت المطبخ ايوة فى حاجة؟ -المفروض انها مش بتكلمنى من اليوم اللى قبلها-
هى:ايوة دى كانت تتقال و انا بتصل, باباكى راجع من السفر و مافيش حاجة تتشرب و عايزة طلبات
انا:طيب ملحوقة عايزة اية هانزل اجيبة من اولالشارع
و قد كان نزلت و جبت الطلبات و رجعت و اتعشيت عشان انام قبل ما حد يجى عشان مش عايزة كلام من حد كفايا الدماغ اللى انا عاملاها , و مالحقتش بابا جة و الوضع بدء يهدى شوى و خاصة انى اتمشورت فى اليوم دة و طلعت عينى فكان نقاط تحسب فى صالحى و لكن لم يستت الوضع تماما
(4)
اليوم التالى
نمت الصبح عشان الارق اللىكان عندى و الساعة 9 لقيت حد بيتصل ..مين ياربى الغتيت دة ,والهانم اختى قمت دروت عليها فى البيت مش موجودة , اتصلت كنسلت, رحت فتحت الباب لقيتها قاعدة على السلم مبتسمة و بتقولى سورى - مش عارفة بئة هى طلعت برة البيت و هى نايمة و لا اية الحوار بالظبط-
سبتها و مافتحتش بؤى عشان ماطيرش النوم من عينى

وعلى الساعة 11 ماما جت صاحتنى-اة هو مافيهاش نووم باين كدة-
:
هى:قومى عشان تجيبى الاكل- واضح انى اتشتغلت بواب العمارة بس يلا مش مهم المهم انها ترضى عنى و تكلمنى
انا:قمت من سكات و ضربت التى شيرت و الجينز و نزلت على الشارع و بردوا دماغى -اتؤرت- عشان بردوا كنت لابسة غامق "مابتعلمش على راى انغام" ور جعت و حطيت الحاجة فى المطبخ و دخلت الاوضة و ششششششششش..و فى معاد الغدا لقيتها جاية تنهدنى عشان الغدا كدة اتاكدت ان الوضع استتب تماما
و على العصر لقت بنت عمى جاية تجر ناعم
هى:يلا عشان ننزل نتمشى اختك مش هتنزل من غيرك و قالتى اجى اقولك
انا:شكرا لسة راجعة من الشارع و حرانة
هى:انتى لية مش بتخرجى معانا و مش بتحبى تستمتعى
انا: جوايا-يا لسانى ادخل فى بؤى- عادى بس مش طالبة نزول
اكيد طبعا انا مش هانزل و النهاردة توتى و كوتى (عمرو و سلمى) فى السويس و الشوارع هتبقى زحمة مووووووت و المواصلات بضرب -البراطيش زى المثل- و مش طالبة خنقة و تفاهة شباب اصلا
هى:مشيت و هى منكسرة لرفضى

على الهامش:
*اى نعم انا زعلت ماما بس انا مش بعرف اصالح حد و هى كانت على اخرها منى و كان على ابعد شوى
*اى نعم حاولت اتصافى مع بنت عمى و هى ماقتنعش بكلامى و شافت انهم بتحاول تقرب منى و انا اللى ببعد بس انا كمان مااتقنعتش بكلامها بس اهم حاجة انها عرفت انها لية بعمل كدة..تقنع ما تقنع دى مش مشكلتى انا
*اخويا النهاردة قالى انة قال للولد انة مش بفكر فى الموضوع و انة بالنسبة لى مجرد اخ مش اكتر وهو المفروض انة يكلم بابا عشان يقولة انة صلى و كل شيئ قسمة و نصيب
*ايدى واجعتنى من الكتابة بس انا كدة ارتحت اكتر..عارفة انى طولت و ان اللى بيقرء هايمل بس كلنا عارفين ان السبيس هو المكنا حيث ينطلق العقل اللاواعى فية بحرية بلا قيود
*الاستاذة منى لحد دلوئتى لا شفتلك موضوع جديد و لا شفت اى اضافة منك