sou's profile® coFEE كيــ تــPhotosBlogListsMore  |  Tools Help |
|
28 February العين فلقت الحجرتن تررم تن تن تررم رم رم ..... دى الانترو بتاعة برنامج صباح الخير يا جريمة
صباح الخير يا جريمــــــــــة
تقديم : كيت
اخراج: مشروع المخرجة الصغيرة مها
السلام عليكم و رحمة الله و بركاتة , كعادتنا فى برنامج صباح الخير يا جريمة نأتيكم بكل جديد و مسلى فى عالم جريمة البشرية
جرائم
غزو
فضائح
مواقف محرجة
و النهاردة حلقتنا علىالمواقف المحرجة بسبب الحسد , هل جربت تبدء يومك بابتسامة حلوة و بنفش صافية و لقيت اليوم اتقلب رأسا على عقب؟؟؟
دة اللى حصل النهاردة , اول مرة اقوم من النوم بدرى , واول مرة افطر قبل ما انزل الكلية , و ظبطت اللبس و كلة تمام و رغم انى اتأخرت شوية عن معاد المحاضرة الا انى دخلت قبل الدكتور و المحاضرة كانت خفيفة و ممتعة جدددددددددا.......لحد كدة تمام؟؟؟
اهو بئة المشكلة حصلت عشان رحت بدرى و كان فى مجال ان الناس تعلق على اللبس بتاعى , رغم انى شايفاة عادى و مافيهوش اى حاجة و انا شخصيا مش بحب الطقم دة اوى بس لبسته من بااب التغيير .....مش غرور و الله و لا تكبر بس مافى حد شافنى الا و اثنى على شكلى و الطقم ( شيك , قمر , شكلك تحفة ...............الخ الخ) فى البداية كنت بتكسف بعدين لقيت الموضوع زاد قلت مابدهاش خلينا بلطجية احسن , كل اللى يعلق اقولة دى اقل حاجة عندى او دة شئ اناممتاكدة منه (طيب اعمل اية مش بحب حد يعلق بمدح على ابدددددددداه) احلى تعليقين سمعتهم و اللى حبيتهم بجد :
-عشت سعيدة و لبست جديدا و متى شهيدة
-بسم الله ماشاء الله , ربنا يحفظك
دول كانوا تعليقين من بنات ماعرفش عرفتهم منين و لا ازاى و لا امتى بس اللى اعرفة انى بحبهم فى الله و هم بيبادولنى نفس الشعور , و دايما محسسنى انى منهم و كل شئ يستشيرومى فية و يشركونى معاهم فى كل حاجة تقريبا, رغم ان مش متعرفين على بعض بقالنا كتير
المهم ان المحاضرة خلصت و فاضل 10 دقايق على المحاضرة اللى وراها و ماعرفش اللى حصل بس اللى اعرفة انى الدكتاورة دخلت و انا اتكتبت غياب (بس مش مشكلتى انا ساعتى مش مظبوطة و كل لما اسال حد عن الساعة يطلعلى بساعة شكل ) انا فى ايدى كانت 11 الا 2 دقيقة و هى معاها الساعة 11 و 5 .....قلت عادى مش مشكلة مش اول مرة يعنى ههههههههههههههه , نزلت ادور على زمايلى و حصل اللى حصل ..................طبعا هتسالوا اية اللى حصل؟؟؟
الجيبة اتقطعت....ماحدش يسالنى ازاى , انا كنت ماشية فى امان ربنا و عديت من جنب عربية و سمعت صوت تششششششششششششششيت و بس
   بقيت مش مصدقة نفسى انى سمعت الصوت و مش عايزة ابص على الجيبة ....اتجمدت كام ثانية و بصيت عليها و يارتنى ما بصيت
 , زمايلى اول لما شافونى ضحكوا من الموقف و من منظرى بس ماتخيلتش انهم يقولولى الكلمة دى ( دى عين حد فينا اصل النهاردة شكل تحفة بصراحة) و ياريت دى كلمة واحدة بس , دة كل حد يعرف من قسمى يقولى حكاية انها عين و انهم ممكن حسدوا بدون قصدالحمدلله على كل شيــــــــــــــــــــــــــــــــــئ
اعترف انى اضايقت لانى كنت ناوية اعمل حاجات كتير النهاردة و طبعا ماقدرتش لانى اضطريت انى اروح على طول عشان الجيبة ,و جراب الموبايل اتكسر كنت هتكعبل على السلم و انا رايحة لزمايلى ...انا لقيت كدة قلت الحق اروح بتنا و اتسخبى تحت الباطنية
كام يوم كدة هههههههههههههههههه, بس عجبنى صراحة زمايلى و ارجع اقول فى النهايةالحمدلله على كـــــــــــــــــــــــل شيـــــــــــــــــــــــــــــــــــــــئ
, كل واحد فينا ممكن يحسد من غير ما ياخد بالة فلما تحب او تحبى تعلقى على اى حاجة كاااااااااااااانت ياريت قبلها نقول بسم الله ما شاء الله او على الاقل ذكر ربنا قبل التعليق و يا سلام يا سلام بئة لو كل واحد يخلية فى حالة
 يااااااااااااااااااااااااة دى الحياة تبقى لوز اوىكدة تكون حلقتنا خلصت النهاردة ’, فى انتظار تعليقاتكم  و ردكم بمواقف محرجة حصلت لكم25 February مابين تحت الصفر و الصفر ذاتةيااااااااااااااااااااااااااااااااااااااااااة على الدنيا
اكتر شيئ اكره بحياتى الشيئ اللى اسمه (اجازة) او بمعنى تانى (الاجازة الفارغة) يااللـــــــــــــــــــــــــه مررررررررررررررررررررررة اكره هالشيئ
بعد ما وزير السلطنة المباركية الله يعمر بيتة نزل قرار اجازة يوم السبت على الجامعة ( و انت مال ......(اتشالت فىالمونتاج) حد اشتكالك؟؟؟ يا عم احنا مبسوطين بنفسنا كدة ,,,,دة اية القرف دة) انا مش فاهمة هم مالهم بيدخلوا فى كل شي بحياتنا , المناهج اجبارى , الدكاترة اجبارى , الاجازة كمان اجبارى.................دول بئة اللى عايزين الح....ق
المهم حالتى فى ايام الاجازة تتراوح مابين تحت الصفر و عند الصفر و دة تقرير سريع للحالة النفسية و المزاجية النهاردة؟
مخنوقة ؟ يوووووووووووووووووووة ماتعديش
قرفانة؟ اوووووووووووووووووووووة ماتقوليش
على اخرك؟ يا اختى انا مش طايقة دبان وشى
عايزة تعيطى ؟؟ ا اعيط اية اومال هو عبط, انا كنت عايزة اصرخ
مقضية تلتتربع البوم مابين القعاد فى السطوح و الهوا يهز كومى كل االعيال اتجوزت و انا قاعدة جنب امى , و مابين الشئ اللى مامتى عايزة تولع فية اللى اسمة الكومبيوتر..........كنت على وشك انى اطق لحد مادخلت حمامة السلام (اختى) على الاوضة و قالت لى:
-تيجى نخرج؟
-نروح فين ؟ و مع مين؟
-كلنا و نروح اى حتة - كلنا دى تعنى 8 افراد يتراوحوا بين الجيران و الاقارب
-قلتلها طيب لما الساعة 7 تيجى يفرجها المولى و قعدت اتفرج على فيلم اكشن ( ماهو الفاضى يعمل قاضى )
المهم ان الساعة 7 جت و جهزنا و اتقابلنا كلنا ( و الظريف فى الموضوع ان كلنا و بالصدفة لبسنا مابين البمبى و الكحلى ) المهم ان الكل بيسال التانى , ها هانروح فين و كانت الاجابات كالاتى:
-نروح فودافون عشان عايزة اشحن ( دة انا طبعا)
-نروح نشرب حاجة ساقعة
-ننزل نجيب طلبات البيت
قبل ما الباقى يكمل ارائة لقينا بنت خالتى بتقول اللى ناوى يستظرف يطلع البيت من اولها مش طالبة نكد ...المهم استقرينا على النادى اللى احنا ماعتبناهوش من 3 او 4 سنين تقريبا , رحنا النادى و كان زى مابيقولوا ترمى الابرة تسمع رنتها فااااااااااااااااااااااااضى بس لما دخلنا جوة شوى ماكنش كدة خالص كان فى ناس كتير بس بردوا ترمى الابرة تسمع رنتها , اصلهم اتنين اتنين (كل الحبايب اتنين اتنين و انت يا قلبى حبيبك فين) كنا احنا تقريبا بس اللى مجموعة بنات و الباقى كلة عبارة عن couples
لفينا شوى و بعدين استقرينا اننا نقعد جنب البيسين اللى ماكنش فية نقطة مياة واحدة و جة الجرسون و طلبنا الطلبات و جاب الجاتوة و الساقع اللى طلبناة , الجاتوة كان يقررررررررررررررررررف انا اتشمللت و ولعت الدنيا و اعدت ازعئ
اية القرف دة , نادوهولى , الراجل جة , و ايوة يافندم و بتاع , انا ماعرفش اتكلمت ازاى بس الكل بيقول انى اتكلمت وحش معاه ( الله بئة وحش و لا حلو ماهو بيهرج ,المهم انى خليتة يرجع الجاتوة تانى) مااهو مش مشكلتى ان الجاتوة بايت , و مش مشكلتى ان الخدمة صفر , انا جاية اتفسح مش جاية اقرف نفسى
طبعا بعد الموقف دة قررنا نغير المكان و استقرينا انا احنا نروح نتعشى فى اى مطعم و قد كان , طلبنا الطلبات و الاكل اتاخر و طبعا (شجيعة السيما ماسكتتش) رحت للجرسون
اية ؟؟ هنعد كتير؟؟
يافندم 10 دقايق بس؟
يتوع اية يعنى؟
البيتزا فى الفرن و الساندويتشات
احنا مش طالبين ساندويتشات
يافندم 10 دقايق
طيب هم 10 دقايق ليس الا
و سبتة ورجعت للترابيزة و البنات عمالة تتريئ على ....بس عادى يعنى احنا اتاخرنا و بعدين مش معقول اللى بيحصل دة
الاكل جة و اتعشينا و هزرنا و الحمدلله حالتنا النفسية (كلنا) بدءت ترتفع عن مستوى الصفر اللى كانت فية
بس طبعا التاخير بتاع المطعم خلنا رجعنا البيت متاخر عن المعاد نص ساعة و اكيد اخدنا كلمتين زى الفل , دة غير تعليقات ماما
-مش دة الجاكيت الجديد؟
-ايوة
-و مالة صغير كدة؟
-صغير ازاى ؟
-يعنى سعتك مش قافلاة لية؟
-ماهو جينز و هو اصلا موديلة مش بيتقفل
-يعنى اية مش بيتقفل؟
-يا ماما و من امتى اصلا و انا بقفل اى جاكيت عندى؟
-ماهو الجو لو برد عليكى تقفلية
-و من امنتى وا نا بشتى يا ماما , ما انتى عارفة انى الشكليات دى مش بتفرق معايا
-تككتتتكتكتكتكتكتكتكتكتكتك
دة كلام فى العضل محاضرة و اخرها روحى ربنا يهديكى
-يا ماما ما انتى شوفتينى قبل لما انزل وماعلقتيش
اهو دة بئة اكتر حاجة بتضايقنى , انا مابحبش حد يتكلم معايا كدة , اللى عايز يعلق على اى حاجة فى يكلمنى بالراحة لكن اسلوب انى غلطانة من ساسى لراسى دة مابيجبش معايا نتيجة...عارفة ان ماما بتحبنى و بتخاف على , بس ساعات بحسها بتراقبنى فى كل شئ , فى الكلمة فى الايمائة فى طريقة اللبس فى الردود ....ايوة من حقها كل دة بس بردوا هى عارفة انى مش بحب التقييد دة , خافى على و راقبينى و عاتبينى و زعئيلى لو كان غلطى كبير بس بالراحة انا مش عيلة , هى بقالها مدة بتقولى انا بحسك بتصغرى لدرجة انى بحلم انك عيلة صغيرة و انا بصحكى للمدرسة ( و لية ماتقوليش انك اشتقتيلى وانا صغيرة هىهىهىهىهىهىهىهىه) يا ماماا مش عشان كل حاجة بقولك ماعرفش يعنى معنى كدة انى صغيرة , و مش معنى ماعرفش انى مابعرفش فعلا , المسألة انى بكسسسسسسسسسسسسسسسسسسسسسسل
بس و الله انا لو جالى مزاج هاعمل من غير ماتقولى على حاجة ...بس النفس حضرتك , و كالعادة انى ادخل فى اى حوار ينتهى فى الاخر بكلمة هقولك اية ربنا يهديكى
يااااااااااااااااااااااااااااااااااااااااااااااااااااارب بجد يا امى .................و الله انا عارفة انى بعاملك بقلة ادب و كتير بقسى عليكى و انتى ماتستحقيش منى كدة .....بس انا مش قادرة , مش قادرة احس باى حاجة حوالية , مش قادرة اتكلم , عشان كدة بقولك دايما مش بحب اسئلة كتير عشان مش قادرة اناقش اى حد فى اى حاجة........تعبانة من جوايا...........انتى كنتى صح لما قلتيلى انك حاسة انك زى اللى بنى بيت و اول لما قرب يخلص لقى كل شي بينهار قدامة
اسفة انى اقولك انى فعلا بنهار , بدمر , و مش قادرة اعمل حاجة لنفسى عشان تعبانة انى حتى افكر انا فين و رايحة فين , سايبة نفسى على راى واحدة زميلتى (ماطرح ماترسى دقلها) بس ماتخافيش على ....ايوة انا ميتة تعب بس جوايا فى اثر لنار ,,,لسة فى حياة 19 February اخبار سريعةاسبوع الدراسة التانى من اولة حسيت ان الترم دة هتطلع فية عين اللى جاوبونا , من اول محاضرة كل واحد طالب تكليف شكل , كأننا ماورناش غيرة , دة غير النتيجة اللى زى الفل (حسبى الله و نعم الوكيل فى اللى ظلمنا فى التقديرات) محسسنى انهم بيدونا صدقة مش بيدونا حقنا فى التقديرات......ناس تقرف والله
عندك حق يا سمايل لما قلتى ان الواحد علية انى ينسى هويتة بمجرد دخولة بوابة الجامعة و يفتكر انة مجرد اسم على ورقة و بس , بس للاسف انا مش قادرة افكر فى كدة , انا بنى ادمة و بتعتب و بذاكر و بحضر و من حقى انى اخد اللى عايزاة , ماحدش بيدينى تقدير من جيبة و لا بيعلمنى من فلوسة , يبقى ماحدش بيمن على و يحسسنى انى بشحت تقدير.....بس بالنظر للجانب المشرق من الاشياء طلعت صافى و الحمدلله فاضلى 4 شهور و افك القيد دة بئة و اتنفس الصعداء زى مابيقولوا بس يارب ماحدش يقيدنى تانى
بالنسبة لموضوع قراية الفاتحة , بجد مرسى اوى اوى اوى يا يوي على الكارت بتاعك , عاجبنى جدا , بس ماحدش بياخد غير نصيبة و الحمدلله ان الموضوع
انتهى على خير قبل ما يبدء اصلا....دلوقتى حسيت براحة اكبر
مها بجد مش عارفة اقولك اية ...بس شكرا على (على) فكرتينى بية و رجعتية للحياة تانى بعد لما كنت افتكرت انة مات , بدء يرجعلى تانى بعد اعتقاد طوييييييييييل انى فقدتة للابد , امبارح كانت حالتى مش تمام و بدون اسباب واضحة او فى اسباب انا مش عايزة اشوفها غمضت عيونى و سندت راسى على مخدتى و اترسم فى دماغى الصورة اللى انتى حاطاها فى موضوع (على) لقيت نفسى بتكلم من غير ما احس فضفت شوى و انتهى الموضوع بدمعتين , اى نعم دمعتين بس حسيت فيهم براحة , تخيلت انى فى شخصين قدامى و انا بحكى , الشخصين دول بردوا واقعيين خياليين , مافيش ما بينا اى حاجة و لا اعرفهم بس ارتحت و انا حساهم جنبى
يوي و مها و سمايل ...... شكرا على كل حاجة 10 February سمك - لبن - تمر هندىكلٌ يغنى على ليلا
 و انا فين ليلى بتاعتشى من كام يوم , بالظبط يوم السبت قررنا السفر للقاهرة
 لمهمة رسميةاتفرج على (عش الزوجية)زى ما بيقولوا, الجو ماكنش مشمس و العصافير بتغنى  , كان مغيم حبتين , على شوى هواء , على سنة تراب , على 5 مطر بيهرج ...اول لما خرجنا من البوابة و عينك ماتشوف الا ال...... ....ماتشوفش حاجة خالص من التراب و الرياح ...شوى و كأن شيئا لم يكن و فضلنا طول الطريق على الحال دة ...5 يقلب و 5 يعدل....المهم ان احنا رجعنا من نص الطريق بسبب الاحوال الجوية طول الطريق وانا براقب الجو ...على يمين الطريق هادى و على الشمال مافيش اى حاجة باينة من كتر التراب---- غريبة مش كدة؟؟
شوى الجو يقلب و يندع و السماء تكون مغيمة وشوى المطر يقف و الشمس تبان و الهواء و التراب يختفوا---- كنت شايفة فى الجو دة نفسى
التردد و الخوف اللى جوايا من ناحية سبب السفر....انا مش رافضة بس مش موافقة
 و العكس صحيح...مش عارفة اخد قرار  , دة اكيييييييييداعترف انى فى البداية كنت رافضة مبدء الارتباط اصلا لانى مش شايفة انى ادة ...لما اتهبتت و اتحطيت فى و لحد النهاردة ماعرفش ازاى هم قروا الفاتحة..بدءت افكر ان دة نصيب اى بنت انها تتجوز و لازم انى افكر بجدية شوية و ابطل احلام صغيرة و انى كبرت و على اتحمل المسؤلية....تخيلوا انهم قرءوا الفاتحة من 2 زيارة
 ؟؟؟؟ ماعرفش ازاى يوميها انا ماتكلمتش ...كأنى كنت مسلوبة الارادة....
 و حتى ماعرفش مين اللى افتكس حكاية انهم يقروا الفاتحة اساسا , المفروض انهم كانوا جايين زيارة عادية جدا هو و اهلة عشان اهلى ماكنوش شافونى فى اول مرة لانهم ماجوش.فكرت ان الجو قلب عشان مانسافرش - قضاء ربنا- يعنى كدة انا فى السليم و سبب الرفض مش جاىمنى .....ممكن تكون تلاكيك منى (ماهو كل يغنى على ليلاة) بس ماحدش وافق
 على الاغنية بتاعتى قال اية الجو
مش مقياس واحدة صحبتى عمالة توصفلى تونيك و هيقى شيك اد اية على البنطلون ...شوى استغربت
لانها مش بتلبس بنطلونات - من امتى البنطلون ؟؟
-يابنتى دة على التونيك و بعدين فوقهم جاكيت و بيكون محترم
-ماهو التونيك قصير
-ماهو فوقة الجاكيت و بعدين انا لما بلبس جيبة بلبس علية حاجات قصيرة و الجيب بيكون ضيق شوى
-
 طول عمرنا لابسين جيباتكلٌ يغنى على ليلا
طار فى الهوا شاشى
 و انت ماتدراشىزية زى اى حلم حلمتى قبل كدة و ماحصلش , بس الفرق ان مش انا اللى كبرت الحلم جوايا و مش انا اللى زرعتة بذورة ....اللى حط البذرة و اللى كبرة هو هواة الشخص اللى قتلة
حلمت زمان انى اشتغل فى قسم علاقات عامة فى شركة , او انى اكون مترجمة بردوا فى شركة , او انى اكون مرشد سياحى .........و دخلت كلية مالهاش دعوة باحلامى بالمرة
مين اللى دخل فى دماغى كلية ترجمة فورية ؟؟ و مين اللى قالى ذاكرى و جيبى مجموعها و هتدخليها ؟؟ و مين اللى بعد لما التنسيق جالى قالى خلاص هننقلك للترجمة الفورية؟؟ مين اللى كان بيكبرالفكرة فى دماغى؟؟ و مين اللى بعد كل دة خلاة حلم ماشفش النور ؟؟
عارفة ان كل دة بسبب الحب و الخوف
بس مهما كان... دة كان حلمى
دخولى الكلية اللى انا فيها حاليا ماكنش سئ بالدرجة اللى تخيلتها اقل نقطة ايجابية انى اتعرفت على ناس ساعدونى ...منهم شخص علمنى حاجات ماكنتش اتخيل انى ممكن اتعلمها , و ممكن نقول انة ورانى باب ممك احقق بية حاجة....بس كالعادة (طار فى الهوا شاشى)
هو مين اللى جة فى الامتحانات و قالى خلصى عشان تشتغلى ؟؟ و مين اللى كل شوى كان يفكرنى بحكاية الشغل بعد لما انساها ؟؟ و مين اللى كان دايما يقولى ذاكرى و فى الاجازة اعملى اللى انتى عايزاة؟؟ و مين اللى دلوقتى لو جبت سيرة الشغل قدامة كأنة بجي سيرة محرمات و بتقابل برفض غريب لدرجة انى بجد بقيت اخاف اتكلم فى المضوع دة كأنى يتكلم فى حاجة عيب او حرام؟؟ اى نعم انا دلوقتى شبة بشتغل بس مش هو دة حلمى و ان كنت احس فى بعض الاحيان ان خطوة فى طريق افضل من الا شيئ
عموما انا شلت الموضوع من دماغى ...ممكن نقول حاليا...بس من جوايا ماعنديش اى استعداد لكلمة لآ قدام اى حاجة اطلبها
03 February عندماعندما يختلط الحابل بالنابل *..
..و عندما تخلتط الخطوط السوداء بالبيضاء..
..وعندما تصدق الوهم و تكذب الواقع..وعندما تكتشف انك واهم..
..وعندما توهم نفسك ان الحقيقة ما هى الا كذبة- صغيرة كانت او كبيرة- و لكنها كذبة..
..وعندما تحتار من تصدق و من تكذب ..
..و عندما تكتشف انك الشخص الوحيد المخدوع ..
..وعندما يختنق عقللك بالافكار و يأبى لسانك ان يطلقها..
وعندما يستسلم عقللك و لسانك و يشرع فى اطلاق افكارة و هنا تقف الكلمات فى حلقك ..
..و عندا تختنق دموعك داخلك..
وعندما تبحث عن (على)و لكنك توقف البحث للحظات لتفكر (هقولة اية)..
...وعندما و عندما و عندما ...
نصبح زى ما مها قالت زى القمر دة
*ماعرفش يعنى اية حابل و نابل دى بس كنت دايما اسمعها و انا صغيرة |
؟؟؟
؟؟؟؟
|
|
