sou's profile® coFEE كيــ تــPhotosBlogListsMore  |  Tools Help |
|
14 November مقتطفات من شخصياتبما اننا فى مصر فعادى ان خدمة التليفون و الدى اس ال تقطع اكتر من 3 شهور عشان بينقلوا السنترال, و عادى ان تطلع عينك معاهم عشان الخطوط ترجع و ياريتها رجعت سليمه , بس اضعف الايمان ان الدى اس ال رجع -اى نعم كل شوية يفصل-بس الحمدلله انه رجع اساسا, بجد ماكنتش لاقية معنى للحياة من غيره, ايوة انا مرتبطة بيه جدا و ايوة كمان ان ممكن اعد
بالايام ماستخدمهوش الا حاجة بسيطة جدا بس مجرد انى اشوف الدانلود شغال و ان فى كومبيوترين فى التاسك بار بينوروا و يطفوا دة بالنسبة لى كفايه.
الفترة اللى فاتت حصلت تغييرات فى شخصيتى , فى ذوقى , فى مزاجى انا مش فاهمه سبب التغيير بس اعتقد ان مها ليها دور و من غير ما تاخد بالها, بالنسبة للمزاج عمرى ماتخيلت انى اسمع لفيروز و انغام و منير -بصراحة كنت بتخنق من التلاته- فيروز بحسها عايزة تكح قبل ما تغنى  و منير كنت بحسة غريب فى كل حاجة و مجنون و مختل عقليا ساعات وهوفعلا غريب بس الغرابة الجمله الاصيلة اللى تحسها مصر بجد اللى تحس ان دة مش بيكدب و مش بيغنى عشان يشتهر و لا يجمع فلوس و انغام كنت بحسها بتمثل بزيادة, ومرة واحدة وبدون مقدمات لقيتنى بسمع منير و انا مضايقة و فيروز لما احب احس بالهدوء و انغام بحس بحاجة فى كلامها كأنه انا...بس دة طبعا هايقف قريب لان على حسب -زوج المستقبل-رافض المعازف بس لسه ماتناقست معاه فى الموضوع دة ,انا مش عايزة اعارض الدين لكن فى راى قال ان الاغانى نوعين نوع يثير الشهوة و دة الغلط, و نوع مش كدة و دة حلال زى الاغانى الوطنية و كدة ...انا بحب اسمع الحاجات اللى لما اكون فى حاله تحت الصفر الاقيها بتدينى نور من جوايا , ابتسامه من القلب تطمنى و تقولى قومى اقفى , طريقك قدامك هايكملمن رمضان و بعد سفر اختى و والدى حسيت انى بقيت مسئوله عن ماما و اخوانى , حسيت انى كبيرة و مسئولة عن نفسى و من حقى اعمل اللى انا شايفاة صح, يمكن ماما ماحستش بكده و
دة بسبب الصراع اللى كان بينى و بينها بسبب اختلاف وجهات النظر و قلقها على اختى المستمر و مش هانكر ردودى الاستفزازية و قلة ادبى احيانا بس عادى مابقاش -بياكل معايا- يعنى عادى اى زعيئة لانى بقيت عارفة انها هتزعئ هتزعئ و بعدين هتهدى و ممكن اروح بعدها اكلمها بالراحة و افهمها اللى انا عايزاه ولو حتى ماقتنعتش بحس انى بردوا هانفذ اللى انا عايزاة
-جبروت بئة-مجرد الاحساس دة اساسا بيدينى راحة نفسية كدة.
احمد -زوج المستقبل-انا ماعرفهوش غير النص ساعه اللى كلمتة فيها من كام يوم ,فى حاجة من جوايا بتقولى كملى لكن احساس تانى بيتصارع معاهو يقولى انتى هاتتنزلى عن حلمك لان
طبيعة شغل احمد السفر و الترحال -زى مابيسميها- بس مش وراء الكلآ و الماء و انما وراء المشاريع لانه مهندس مدنى , على حسب المشروع بيكون مكان تواجده سواء بئة كان العريش و لا شرم و لا السخنه ولا ولا ولا ...يعنى بابا بيقولى انتى تحضرى بؤجة عشان تبقى على طول جاهزة , و انا ناوية اتنازل عن البؤجة مقابل الاب توب..موضوع السفر دة خاوفنى اوى لانى ماتعودتش اكون بعيدة عن اهلى و بعدين بئة -شوشو-عمال يقولى طب افرضى حد فيكم حاصلوا حاجة هتعملوا ايه و انتوا الاتنين بعيد عن اهلكم , افرضى اتخانقنتوا -قال يعنى خلاص انا لبست الدبل اساسا- الخوف التانى انى معنى انى بسافر كتير اسبوعين هناك و يومين هنا يعنى بالعربى ماينفعش لا ارتبط بشغل و لا حتى كورس..مش عايزة افكر انى هاكون شنطة سفر..صح انا هاكون كدة ؟؟؟
عموما يا سمر انتى و مها عشان انا عارفة انكم مستنين اخرالموضوع ...حتى الان ان شاء الله الفاتحه و الدبل هاتكون على العيد -فى حالة بابا ماسفرش الحج- ولو سافر يبقى لما يرجع ان شاء الله. كلمة لاحمد :انا خايفة جدا منك على فكرة عشان انتوا كلكوا واحد و انا مش معجبة بتفكير اخويا اللى انت شايفه شخصيته لذيذة و بكرة ان حد يجبرنى اعمل حاجة او مايشركنيش فى قرارته و زى ما انت طموح انا كمان حاول تفهم انى عايزة اكون زى ما انت بيتحارب عشان تكون
قبل ما اشوفك عمرى ماتخيلت انى فى -ولد- لسه بيفكر زيك و ابيض من جواه زيك...حتى االان حاسه انى دة حكم غلط واكيد هتطلع زى العادى..اصل انتوا نسخ من بعض..اسالنى انا
 دة انا طلعت عنيى معاكم -عشان اخوانى- لما بتفرج عليهم هم و اصحابهم ..احساسى تجاه الموضوع دة شبه مبهم انا بحس انى فرحانه -مش بمعنى فرحانه-بس راحه لما شفت الفرحة فى عين امى و ابويا و فى عين والد احمد , لكن فرحته هو انا ماشفتهاش عشان اساسا انا مش عارفة ابصله
 -لانى حاسة انى تحت المراقبة من كل العيون اللى قاعدة- بس بجد انا مش حاسه بالاكزيتنج ان اخد الخطوة الجايه و بتخنق لما مرات اخويا تقولى عاملة ايه و تغمزنى او حد يقول ولو بتهريج اه ياعم ماحنا هنتخطب ولا اتخطبنا...ههو حتى لو حصل مش الحاجة اللى هتحسس حد بالفرق فى التعامل معايا...مش فاهمه يعنى هو لما اتخطب هعتلى العرش؟؟؟
و يا سلام لما ماما تعد تكلمنى على الجهاز و العفش و فستان الفرح و اللى مش عارف ايه
 . ............بتجنن بيقى هاين على اقولها بالراحة شوى على يمكن سبب الابهام فى الاحساس انى ماكنتش بحلم بيه..ايوة انا حلمت زمان لكن من كتر الاكتئاب سواء كان بسببى او بسببب الظروف اللى حواليه و احساسى انى بلا قيمه او فايدة خلانىمش عايزة حاجة و لا بحلم بحاجة غير انى اكون انا زى ما انا عايزة مشاكون جزء من جزء اخر بنتمى ليه ,مادورتش على الحب ولا فكرت فيه يمكن لانى زهئت من انى احسه موجود و بعدين
يختفى
النهاردة و انافى الميكروباص كان فى واحد بيشرب سجاير و الرياح كانت شباكية سوقيه -يعنى على ناحية السواق- و الراجل ياخد النفس و يطلعه زى البركان و الدخان يطير كل الناحية التانية على وش السواق ..انا استغربت هو السواق ساكت ليه
 !!! و الله انا لو مكانه كنت هاكله ..هو ليه قلة الاحترام لادمية الناس ؟؟هو ليه الشعب المصرى بقى ماعندوش اصل كدة؟؟؟
اما بالنسبة لرحلة البحث عن وظيفة , فعلى حسب خبراتى الارشيفيه قبل دخول الكليه -قافية جامدة اهو- ان القسم بتاعى (دراسات او تاريخ) مطلوب لوجود عجز فى المدراس لكن الصدمة بعد التخرج ان المديرية قالت احنا عندنا فائض... ومع متابعة التحقيقات فى الموضوع لقيت ان المسالة مش فائض و عجز المسالة مسالة الكادرالجديد, الكادر نزل و اتطبق بقالة شهرين تلاتة و طبعا الحكومة غلبانة و مش لاقية العيش الحاف و بالتالى -هى قادرة على اللى عندها لما هتعين ناس تانى- و عمااااار يا مصر 10 November why
why men never believe about women?? why never give her achance and always try to cut her wings?? why should she saty in cage till he give her the way to fly?? men not always right, not awlays smart, not always powerful.... iam good enough to do what i want...iam good enough to be better than you.. and guess that is your nightmare to find me better than you... i will not saty in the bloody cage for ever .. i will leave it soon..to where ME .. to where I.. to where no YOU to say NO |
!!!!!طب منين يا عم الحج
- مع احترامى لية طبعا بس مش لاقية تعبير تانى ان مدرس واحد ياخد اكتر من 6 فصول..السنه اللى فاتت ايام التربية العملى كانت المدرسة واخدة اعدادى كامل بتاع 8 فصول لوحدها و كانت بتشتكى و طالعان عين اللى جابوها
عشان فى الاخر يقولك اصل عندنا فائض.
|
|
