اممممم مافيش شى محدد للكتابة بس هى طالبة كتابة......ممكن نتكلم عن الشتا اد اية هو بارد و احلى ما فى برودتة , بحب اوى الصيف فى الشتا -يعنى تلبس صيفى فى البرد - احساس فريش اوى ....الدفى عندى رمز للخمول و ان كان رمز للعطف و الحنان فى بعض الاحيان بس كسل اكتر ....ياسلام على كوباية الكاكاو الساخن فى عز البرد و الاحلى انك تاكل ايس كريم فى الشارع...من ايام ثانوى و انا الشتا عندى مرتبط بالذكريات السعيدة -ناويين يعلنوا الخطوبة قريبا فى الاسواق هدية على علب الكاكاو- افتكر فى ايام الثانوى لما يكون الجو باااارد و احنا رايحين الدرس و بعد لما نخلص نروح انا و زمايلى نتمشى و نجيب شيكولاتة كيت كات شانكى و جلاكسى كراميل و نرجع البيت بعد الدرس بسعتين تلاتة و دايما اعذارنا جاهزة (اصل كنا بنصور ورق او المدرس اتاخر ,اصل المواصلات صعبة و.الخ) كانت احلى الايام.

 المدرسة و جروب اللى بالى بالك:

كان بردها ممتع انك تقوم غصب عن عينك و تلبس و تنزل المدرسة اكيد طبعا بعد معاد الطابور و ممكن تدخل فى بداية الحصة الاول -ثانوى بئة و ماحدش ادنا- و مش مكفيك انك رايح متأخر لآ و كمان جاكت المدرسة مخالف توصل الفصل نقفل كل الشبابيك-عشان نعرف ننام براحتنا- بما اننا كنا قاعدين جنبها و لما الطلاب يشتكو و يقولوا افتحوا عشان اللى عندة برد مايعديش الباقى نقولهم مش مشكلة , ما انتوا كدة كدة هتعيوا  او اللى مش عاجبة يطلع برة الفصل - بلطجة يعنى-  , كانت مكونات شنطة المدرسة كالتالى : كيلو او اتنين يوسفى(خراب بيوت مستعجل) +شيكولاتة+ووكمان(دلوقتى بئة الام بى ثرى فى المدارس)+شرايط +مذكرة درس عشان تعمل تقل فى الشنطة بس و لعل و عسى حد فينا ينزل علية الالهام و يحب يقرء كلمة كدة و لا كده , حفلات البرتقال و اليوسفى دى كانت يومية من اول اليوم لاخرة بناكل يوسفى  و الحصة شغالة و المدرسة كانت بتعرف اللى احنا عاملينة من ريحة البرتقال و اليوسفى بس الحمدلله ماكنش حد بيعمل معانا حاجة اوى......خلصنا كلنا و تقريبا كلنا مع بعض فى كلية واحدة و نادر لما بنشوف بعض و لا نسلم حتى على بعض

البيت بيتى :

رمضان و انا فى ثانوى فاكراة كأنوا امبارح , كنا نفطر بسرعة واول واحد يخلص الفطور يروح يجهز للشاى و الكابيتشينو و نجرى جرى على اوضتى انا و اختى و اخوى و بنت عمى و اللى يلحق ينزل تحت البطنية الاول و طبعا كان دايما الشخص دة انا و باقى الافراد يجهزوا الشاى و نعمل فرح شيكولاتة بكل الانواع و الماركات , بجد كانت ايام جميلة كلها فرح و ضحك و مليها الحب , لكن مافيش حاجة بتظل على حالها , كلنا اتغيرنا و انا اعترف انى اولهم , مابقناش بنتلك كتير و يمكن خالص ,شخص من المجموعة دى اختفى و انا بعتبرة فعلا اختفى رغم انى اتمنى العكس -الشخص دة بنت عمى- كنا اكتر من اصحاب فىايام الثانوى ,ماما كانت بتزعئلى دايما بسببها عشان كنت ارجع من المدرسة و الدروس على بينت عمى الاول و بعدين اطلع البيت او كنت اتصل من عندها و اقول انا جيت عشان ماحدش يقلق على , ياما سهرنا مع بعض و ذاكرنا و هزرنا و لعبنا , ياما قاومتنى من عز النوم فى الشتا عشان تنام هى رغم ان البيت واسع بس هو القط يحب خناقة...كانت دايما بتشجعنى على المذاكرة , كانت مواسيانى فى كل لحظة ضعف , وقفت جنبى كتير , اتعلمت منها حاجات كتير دى حاجة اعترف بيها...........لكن مرة واحدة بعد الكلية انا حسيت انى اتغيرت و هى كمان اتغيرت و كل اللى كان زمان دة بئة مجرد ذكريات يعنى مثلا انا ماشفتهاش من ساعة رجوعى من السعودية الامرة واحدة بس , ماعرفش التقصير منى و لا منها , بس انا مابقتش فاهماها و مش هى دى اللى كانت صحبتى زمان بس على الاقل هى هتفضل طول عمرها بنت عمى , اى نعم طلعت عينى و انا فى السعودية و كانت بتعصبنى لدرجة كنت مسميها المستفزة و هى كانت بتضايق من كدة بس يمكن هى ماكنتش تقصد و يمكن انا اللى بقيت عصبية بزيادة و يمكن  و يمكن و يمكن ..............لحد دلقوتى انا مش فاهمة اية سر التغيير اللى حصل ؟ و هى لية بئة اسلوبها كده ؟؟؟انا لية مابقتش متحملة حاجة و لا حد ؟؟لية عصبيتى السريعة دى؟؟

بس كانت ايام حلووة بجد ايام ثانوى مع البرد و الشيكولاتة اللى هى كانت دايما الراعى الرسمى لحفلات الكابيشينو و الشيكولاتة

.

اعترافات سرية: متسربة من جلدة الحنفية

انا مابرتحش فى وجود ناس كتير ماعرفهاش حوالية ,و مش بحب اخرج مع حد و خصوصا لو رايحة اجيب طلبات للبيت ,بحب اكون لوحدى مش بحب اربط نفسى بحد و لا حد يربط نفسة بى , بحب اتمشى لوحدى و لو فى حد ماشى معايا مش بحبة يتكلم , مدام ماشيين مش عايزة كلام , مابحبش حد يتناقش معايا فى كلامى بمعنى انى ماحبش اقول حاجة الاقى اسئلة لية و ازاى و عشان اية و منين...بتجنن منها....يمكن هو دة اللى خلانى عصبية لانى مابقتش متعودة على وجود ناس و الوضع اللى انا مش متعودة علية بيوترنى.

انا مش بحب احكى كتير و ساعات بكسل ارد على اى كلمة تتقالى , يعنى ممكن حد يكلمنى و ابقى عايزة اعلق على حاجة بس بكسل افتح بؤى و اكتفى بالابتسامة او ايمائة الرأس ...بس الكلام دة طبعا مش على طول الخط حكاية كسل الكلام دى , دة انا لو كده مش هطيقنى , بس لما اطون مأكسدة و مقفلة من المحاضرات

صديقى الصدوق نمول:

بلوج سريع جدا عن اخر اخبار الغزو.............امبارح كانت حفلة غسل الكوتشيهات و طبعا كنت انا المتبرع بالقيام باعملية دى المهم بعد لما طلعت عينى فى 5 كوتشيهات و حطتهم فى البلكون عشان ينشفوا جيت اطلعهم النهاردة و كانت الصدمة الكبرى

وقع اختيار النمل على الكوتشى بتاعى لانشاء مستعمراتهم ...حسيت فى ماسورة نمل طفحت فى الكوتشى ...شكلة كلن بشع بجد...اشمعنى الكوتشى بتاعى انا ؟؟؟!!!!!!!!!!! و اشمعنى حاجتى انا اللى دايما هو بيختارها؟؟؟هو انا عشان سكر حبتين النمل هايص!!!!!!!!!! و على رأى واحد ماعرفهوش (نفسى اولع فيهم بالكبريت)ء